مبقولش

مبقولش نفسى الأغلى عندى ومبقولش إنك مبتحبيش
أنا بس عايزك على نفسك تحنى ولو عليا متحنيش
مبقولش تعبانى أو حتى جارحانى ولو جارحه متقصديش
إحساسى بيكى كان مجننى إحساسك بيا مجننكيش ؟؟!!
ببكى وبشتاقلك وأشوفك جايه أضحكلك تقابلينى متضحكيش
اقولك غيرى طابعك تقولى هوه ده عاجبك ويعجبنى وما يعجبكيش
وأقولك غيرى لبسك تقولى إنته مال اهلك مبتدفعليش
تقولى يللا كده سلام أقولك بس إهدى وإستنى
أقولك معنديش كلام تقولى روح ماتلزمنيش
بحبك وفى سكتك سارح وظلمك ليا متوهنيش
وطيب قلبى مش جارح وقلبك ماليه الطيش
بترمى كلام مالهوش معنى ومش فاهماه إنتى إيه مابتفهميش ؟
تردى الكلمه تنتقمى وواحده بواحده متشتمنيش
بأى شكل عايزه تغلطينى ولو حكمتى عقلك وفهمتينى
مش قصدى أجرحك متتلككيش
مكان ماتروحى أنا ضلك
أنا إللى باقيلك أنا إللى فاضلك
انا إللى ليكى هموت وهعيش
رديتى وكان ردك كداب متسبتنيش
لمست إيديكى وبقرب سحبتيها وكإنى أجرب
وقولتيلى إبعد ما تلمسنيش
بشد فى شعرى من غلبى وكان ناعم بقى كانيش
وأعمل إيه أنا فى قلبى مابتهونيش
وأخر حاجه هقولهالك يا تهتمى يا متهتميش
وعشان فاض أنا بيا ومش هشحت حبة حنيه
عايزه تمشى ماشى مش عايزه ماتمشيش
ممكن أعديلك فى حجات تافهه لكن فى الغلط مبعديش
أصل أنوثتك ممكن تسمحلك
بس رجولتى ماتسمحليش