كل نهضه وإنته طيب

كل نهضه وإنته طيب ياا راجل يا طيب
قال إيه واقفين ليه هوه إنته منهضتوش
ننهض ليه وعلى إيه دى النهضه طلعت فنكوش
لزوم الزواقه والحركات
وكانت أصلااا ضمن الشو والإعلانات
نوع من الدعايا على غلاف المجلات
شعار مزيف من ضمن الشعارات
ضحك ع الدقون والشعب نايم من الساقعه
طلعولنا م السجون عشان يوقعونا حتة واقعه
كل نهضه وإنته بخير وبعوده النهضات
ونسمع كلامهم نحس بحجات
دول عملو م الفسيخ شربات
وكلام متزوق من بتاع ولاد الزوات
مشروعنا ده مشروع خطير
بنخطط ليه من أيام عصر البشوات
مشروعنا ده فكرة 100 عالم مإللى لابسين نضارات
علم بس على رمز الميزان وليك الأجر والحسنات
أدينا علمنا يا سيدى ورينا فين الإنجاازات
طلعولنا شيووخ على ناس تانيين
إشى حازمون على سلفيين
وبيأيدو أى قرارات
ياعم إنته فاهم بتأيد فى إيه
طب إنته عارف بتهتف ليه
يرد يقولك شرع الله
مهو إحنا مؤمنين وعايزين الشرع وعايزين الدين
وعايزين نبنى دوله فيها حياه
هوه إنته هتخالف ياعدو الله
رئيسنا الملاك إللى جاى م السما
يسمع نداك يلبى الندا
وكلمة السر وااه مررسااه
طب ووووواه مرساااااه
وتطلع فتاوى وتطلع بلاوى وإللى يعارضو جهله وكفار
وفى الإستفتاءات إحشد وهات
قول نعم تخش الجنه هتقول لاء هتخش الناررر
حلل وحرم على كيفك وقول
دفع وغررم ده ياما دقت ع الروس طبول
طب خد لما أقولك
طورت الزراعه؟؟.. جددت الصناعه؟؟
طب نشطت السياحه؟؟
ليه كل همك قفل المواقع بتاعة الأباحه
عايز الصراحه
موت العيال عند القطر
وموت الرجال عند القصر
آدى الأباحه
فين الوعود بتاع الإنتخابات
فين النهضه وفين حق إللى مات
ولا إنتو كلامكو كان كلام إشتغالات
إهتف ياعم وهلل وصيح
ونافق يا شيخ وزيد فى التجريح
بس إنته عارف ده شعب صريح
لا بيهمو حد ولا بيهزو ريح
طول منا شايفك بتغلط مش هسكت وأكيد إنته عارف إنك غلطان
أصل إحنا شعب مينفعش نسكت مينفعش نبقى عبيد أوخرفان
إسمع لما أقولك وركب 100 سماعه
إنته مبتحكمش فى ملكك ولا ملك الجماعه
ده شعب بطبعو عنيد وثائر
ولا يهمو ظالم ولا حاكم جائر
فين البلد بقى ع الخريطه
ياخوفى البلد تلبس فى حيطه
وساعتها تقوم مصدر العبيطه
شغلها صح عشان تبقى صح
ومتنفضش إيدك وتقول معدش وبح
عارف اللى نازل بيتمنى الموت
ما يعرفش يسكت ده يموت م السكوت
فاهم كلامى ولا محتاج توضيحات
إعمل فى حسابك زادت الحسابات
طور ونضف وبلاش تانى تحلف
خلاص شبعنا ومينفعش نهتف
طول منا شايفك بتغلط مش هسكت وأكيد إنته عارف إنك غلطان
أصل إحنا شعب مينفعش يسكت مينفعش نبقى عبيد أو خرفان..

********************

لو كنا ضلينا الطريق

طول الحياه مستغربين
هوه إحنا ليه عايشين
من يوم ماكنا صغيرين
نفس الدموع فى العين
كام حلم راح قدام عينينا سيبناه يموت
كُتر الجراح علمت فينا ومش قادرين لسه نفوت
لو كنا ضلينا الطريق لو توهنا فى السكه
يجرح حبيب يجرح صديق ماتت خلاص الضحكه
أكيد فى حل وفى نجاه
مش ده إللى ياما حلمنا بيه مش دى الحياه
دور من تانى ده فيه بديل
لسه جاى العمر الجميل
عمر الحياه ماهتنتهى ويتحكم فينا إنسان
نفس الوشوش نفس الملامح نفس المكان
وكل يوم بنسأل ليه ما بطيبش الجراح
دور على حد يمدلك إيدو
قبل الدموع قبل الهموم ما يذيدو
دور على حد يعوضك كل إللى راح
ياما إنجرحت وقولت إنتهيت
ضهرى إنحنى من كتر ما آسيت
بس الأمل عايش عليه
ده ليا رب وعشمى فيه
عمرى ما إتمنيت أموت مش دى النهايه
طول ما فيا نبض وليا صوت هعيش الحكايا
هرسم بإيدى الضحكه لو حتى كانت ع الورق
همشى زى ماتيجى فى أى سكه
أصل إللى جاى أهون م العمر إللى إتسرق
مليون حكايا فى قلبى وقلبكو
إيدى بتتمد لأى حد منكو
أصل الحياه رحله فيها دموع وفرحه
ووشوش حلوه ومسامحه
لو كنا مشفناش منها غير الوش الخشب
يبقى العيب فينا مفيش داعى للعجب
إنسى القلوب الجارحه ولون الأيام
إقلب خلاص الصفحه وإروى عطش الأحلام

إنسى القلوب الجارحه ولون الأيام
إقلب خلاص الصفحه وإروى عطش الأحلام..