ناس غريبه

بقابل ناس غريبه
قلوبهم مليانا طيبه
وألاقى أعز أحبابى
بيعاملونى مُعامله عجيبه
الطيبه الزايده لو عيب
ميزه فى نظر الغريب
وأنا طيبتى دى فى دمى.
لو كل الناس جرحتنى
وبأبرد سكينه دبحتنى
مش هغير شىء
إتعودت عليه من صُغر سنى
لو كل يوم هبات
ببكى من سُكات
دموع الظلم أكرم لى
وإيه يعنى أبات مظلوم
أنا أقوى بالإحساس
والحب والإخلاص
وإللى إنظلم أكيد
حقه هيرجعله فى يوم
عمر الإحساس ماكان زمب
ياقلوب بتموت من الحب
الحب هيعيش هيعيش
ناس بتتباهى بالخيانه
قلوبهم عليله تعبانه
ومن ربها مبتختشيش
وإنته يا ملاك يا طيب
الفرح مستنيك
داوى قلبك وطيب
والحب لو يوم جالك
قوام مدله إيديك
 

مات قبل ما يعيش

قلبى إللى طول عمره حزين... حزين
تايه وسط الناس ... مع التايهين
لا فى يوم الفرح دق له باب
أو إرتاح من العذاب
والصبر ضاع ويجيبو منين...منين

كل يوم أحلام يعليها...جرح الزمن يرميها
وبينزل على مفيش...ينزل على مفيش
القلب الطيب إللى كان...الحب ليه عنوان
مات قبل ما يعيش... مات قبل ما يعيش

*************************

حبيت من جديد

حبيت من جديد والحياه ماوقفتش عليكى
قلبك أجمد م الحديد وتبيعى أعز ماليكى
 وأنا مش ندمان على أيامك أصلى إتعلمت
لو كنت توهت فى أحلامك فأنا منك فوقت
ولو ليه مكان أو ذكرى إنسيها دلوقت

حبيت من جديد وإتعوضت لياليكى
حبيت من جديد والحياه م وقفتش عليكى
حبيت من تانى ومش هيفرق جرح معايا
 قلبك سابنى ورمانى وقالى خلاص كده كفايا
ماشى بكفايا ده إنتى الخسرانه
وبكره توصلى للنهايه وترجعى ندمانه
حبيت واحده زى القمر و إنتى طلع فيكى كل العبر

قلبى البرىء الطيب هيفضل للقلوب طبيب
ولو الطريق طول مش هندم وهقول قسمه ونصيب
همشى مع الإنسانه إللى إخترتها
وياحزن خلاص إنسانا والأفراح دى وقتها

ماضى ....... ما يغور الماضى
راضى...... راضى ببنت بلادى
الدنيا لو ضحكتلى...أموت أسير الضحكه دى
الحزن لما هينسانى أكيد هيفتكرك
القلب إللى عاش أنانى والحب إللى مات بغدرك
عمرى ماضيع بين يأسى وعذابى
دى كل حاجه بتاخد وقتها
لو بنيتى سعادتك على حسابى
 الفرح فى أيامك  قولى عليه إنتهى

وإللى أنا حبيتها... ولقيت دنيتها
دى ست ستك وليها معزتها
هتاخد قلبى إللى إنتى خسرتيه
وبكره هتتمنى لو بعمرك تعوضيه
حبيت واحده زى القمر
 وإنتى طلع فيكى كل العبرر

************************

شىء طبيعى

شىء طبيعى

مهو شىء طبيعى... أحب بعدك وإنتى تضيعى
مهو شىء طبيعى
ألاقى إللى يداويلى جروحى
وإنتى تلعنى اليوم...إللى فكرتى فيه تبيعى
هتجيبى إللى صان... زى إللى خان
لا مش طبيعى
أيوه هعيش الرحله...من غيرك أحلى وأحلى
وقابلينى لو عرفتى تعيشى
أيامك إللى جايه ليل...متلونه بالويل
مرسومه بالعذاب
الجرح هيبقى 100 ...حياه زى الموت وهيا هيا
وده أقل درس.. لقلبك الكداب
صدقينى ... بكره هتتمنى نظره...أو إنك تلمحينى
صدقينى بكره تحسى بقيمتى...وتقولى ده كان أغلى الأحباب

أنا إنهارده بعيش حياتى... فرحان بإللى وصلت ليه
دايس على كل لحظه فى ذكرياتى... ناسى كنت بالنسبالى إيه

والملاك إللى واقفه جمبى...ملكت كل قلبى
ليها دين فى رقبتى..مهى سر الفرحه وسعادتى
بكره أعيش فى الجنه...من غير ما أحلم أو أتمنى
وهتدوق طعم حنانى..هتعيش فى ربيعى
مهو شىء طبيعى....أحب بعدك
وإنتى أكيد تضيعى.

أحكى للدنيا عليكى

عاوز أحكى للدنيا عليكى
قد إيه طيب قلبك وقدإيه بريئه عنيكى
عارفه بجد حبيتك
وكمان خايف تروحى منى
ياما فى أحلامى إستنيتك
وكانت دموعى بتحضنى

القلب إللى واقف قدامك ياما إتظلم من الناس
ونفسو يبقى حاجه فى أيامك وبيوعدك بالإخلاص
أسف عشان إنتى مش حُبى الأول
لكن يا حبيبتى هيبقى حُبى الأجمل
مهو كله كان نصيب
وبجد شوفت العذاب
لكن حُبك مش هيغيب
هسد عليه الباب

متضحكيش على كلامى ده بجد أصدق كلام
ولو حكيتلك غرامى مش هيكفينى أياااام
يللا بقى قوليهالى خلى الحياه تحلاالى
وأفرح زى باقى الناس
قلبى إللى صدى وإتهان
حاسس فى عينيكى الحنان
وعمرى ما كدبت ده الإحساس

أنا مستنى وأملى فيكى كبير
ولما بقى هتحنى هفرد جناحى وأطير
هتلاقى حب مفيش منو
هتلاقى قلب كله ضمير...

يا رب أنا راضى

يارب
فيه ناس لو غابت طول العمر ماتتنسيش
وناس تدخل فى القلب وجواه لازم تعيش
وناس فى ثانيه بتتمحى وإتعملت من مفيش
ناس ذى الدهب مهما يمر الوقت
بتحفظ دايما قيمتها
وناس نار ولهب بتنطفى فى ساعتها

الدنيا دى لعبه ومش مفهوم فيها شىء
فى عيون ناس صعبه وناس شايفاها لاشىء
فيها ناس عايشه بتوفى و عايشه بإخلاص
وناس تانيه بتجرح ومعندهاش إحساس
أنا يمكن أكون غلطان لكن عمرى ما جنيت
بدفع من دمى عذاب وألام علشان بجد حبيت

أنا فى الدنيا طير
بعامل االناس بضمير
نفسى فى حبة رضا من رب العالمين
لو ربى راضى عليه
هشوف الفرحه بعينيه
مش هبقى تانى حزين
ولو زعلان منى...يارب أرجوك سامحنى
الناس بتجرح فيا وجراحهم هموم حواليه
أنا بتمنى الفرحه وبتمنى ترضى عليه

حاسس إنى أذنبت فى حق نفسى وحياتى
ويارب خلاص توبت وهبدأ وأعيد حساباتى
حقيقى أنا ندمان ع العمر والأيام
إللى إنجرحت فيها
هوه عيب أعيش إنسان أوفى وأدى الأمان
وأندم فى الأخر عليها

على قد منا تعبان وشايل هموم وألام
برجع وأقول ربنا ما يرضاليش العذاب
يمكن يكون إمتحان يعدينى لبر الأمان
ومن تانى ألاقى  الأحباب
يارب أنا راضى ومسلم أمرى ليك
ومش ندمان ع الماضى ورامى همومى عليك
قادر فى يوم تفرجها وتموت كل الهموم
وألقى حياتى إتبدلت بين ليله ويوم
يارب أنا راضى ومسلم أمرى ليك
ومش ندمان ع الماضى ورامى همومى عليك.

************************

هات إيدك يا صاحبى

هات إيدك يا صاحبى أنا عارف إيه بيوجعك
ويللا إمسح دموعك وإتكلم وأنا هسمعك
ليك رب يعدلها لينا رب كريم
والأحوال يبدلها وبدل النار نعيم
الجرح مسيرو يتداوى
وتطيب كل الجروح
والحزن فى يوم هيتتاوى
وكل الهموم هتروح
لو بصيت للناس هتهون عليك أيامك
ده فيهم اللى إنداس وإللى يتمنى مكانك
وربنا عالم بيهم وقادر يأخد بإيديهم
بس ده درس مفيد ولازم يتعلموه
ولو الإيد فى الإيد الحزن هيبدلوه
بس ده درس مفيد ولازم يتعلموه
ولو الإيد فى الإيد الحزن هيبدلوه
وإنته يا صاحبى مجرد سطر فى الكتاب
فيه اللى شايل كام صفحه وعايش فى العذاب
عيشها وإرضى بيها...يمكن تهون لياليها
وإفتح للفرح باب

بكره الحق هيعود ده كما تدين تـُـدان
ده كل شىء مكتوب وبتلف الأيام
وإللى باع إنهارده يجيلو يوم يتباع
ولازم بنصيبك ترضى وتأمن بالوداع

عارف همك تقيل بس ده رب كبير
قادر على كل شىء لو كان حمل الجبال
بكره يبان الطريق وتقول صاحبى قال
قادر على كل شىء لو كان حمل الجبال
بكره يبان الطريق وتقول صاحبى قال.
**************

جايه الإبتسامه

أيوه جايه الإبتسامه
وفيه أماره وفيه علامه
وكل أحزانى هشيلها
وإللى راح مع السلامه
ماضى عدى مبكيش عليه
وإللى باعنى أعيش له ليه ؟
كل أيامى هعيشها
وإللى شالنى أشتريه
الهموم بتتكاوم عليا
والسبب دموع عينيه
والحياه حلوه مره
هيا مره مفيش إتنين
عمر عدى خلاص هسيبو
وكل واحد هيشوف نصيبو
ليه أكمل الباقى حزين

أيوه جايه الإبتسامه
وفيه أماره وفيه علامه
وكل أحزانى هشيلها
وإللى راح مع السلامه

حضن دافى  وقلب طيب
فى الحياه ياما هقابل
يمكن يكون جمبى وقريب
حد بجد  يستاهل
لازم أسعى وأشوف نصيبى
مش هموت من بعد حبيبى
والحياه ماشيه عادى
ليه هوقفها عند الماضى
لازم أبدأ من جديد لازم أبص لقدام
لازم أبقى فى يوم سعيد
وأبدأ من تانى الأحلام
بالتفاؤل والأمل... مهما حصل ولا إتعمل
مين هيقدر يمنع نصيب... وكل شىء ليا إنكتب
ربى عالم بإللى فيا... بكره لازم تضحك شويه
والحياه لو كانت جارحه... بكره هلقى أحلى فرحه
بكره هبقى ميه ميه
الحياه نعمه فى إيدينا
بيها تبقى فرحة عينينا
وكل ضحكه لما بنضحكها
أجمل هديه وأصعب أمانه
بس جايه الإبتسامه
وفيه أماره وفيه علامه
وكل أحزانى هشيلها
وإللى راح مع السلامه..

جرحك

جرحك

جرحك إللى بيقتلنى موت إحساسى بالفرحه
خلانى عايش على الهامش مجروح وإنتى إللى جارحه
ولما بشوفك فرحانه عينى ليه بتدمع
وإزاى على حبى ندمانه وظلمك بين الناس مسمع
اه لو تحسى طعم الظلم إيه
أكيد هتعذرى قلبى وإللى حاسس بيه
بموت من خنقتى وتعبان فى وحدتى
جوايا ميت هم طابق على نفسى
نفسى أصرخ بعلو صوتى
نفسى ينكسر سكوتى
وأعيش مره لنفسى

جرحك إللى بيقتلنى موت إحساسى بالفرحه
خلانى عايش على الهامش مجروح وإنتى إللى جارحه

مش هقولك إرجعى أنا بس عاوزك تسمعى
وتشوفى همى التقيل
شايل جوايا أوجاعى ..حزين وساكت بلا داعى
حياتى أهيه بقضيها ليل بيجرح ليل
بجد خلاص فاض بيا...ماشى والجرح ليه فيا
وأعيش أو أموت هيا هيا
مبقيتش تفرق عندى كتيررر
مخدوع والظلم حمله كبير
وناس عايشه من غير ضمير
حرررام يا دنيا ترمينا وكنا فى عينك نورر
حرام بشرب المر وأنا مجبور

بجد خلاص فاض بيا ...ماشى والجرح ليه فيا
وأعيش أو أموت هيا هيا
مبقيتش تفرق عندى كتيرر